Mold

av Ragnvald Skrede


Den milelange åsen
av stum kald stein
ber eit tynt lag av mold

Livna or den mold
har granskogar susa
og bregbrurer svaga

Livna or denne mold
har kvinner fødd born
og menn gått i krig

Smuldra i all denne mold
kviler ætt over ætt
under ungdoms leik

Menneske blir mold
medan stein er stein
Berget er og var

Om all mold blæs av berget
vil berget skapa ny mold
Berget var og blir

Den milelange åsen
av stum stein
drøymer og skapar mold


Kjelde: Lauvfall, Aschehoug, 1969, s. 14